Saturday, November 17, 2018

ಸುಮವರಳಿ ನಕ್ಕಾಗ....

ಸುಮವರಳಿ ನಕ್ಕಾಗ....

ಎನ್ನ ತೋಟದಲರಳಿ ನಗುತಿರುವ ಸುಮವೊಂದು
ಎಲ್ಲ ಕಣ್ಣಿಗು  ಮುದವ  ನೀಡುತಿಹುದು.......... !
ಎನ್ನ ನೋಟದಲಿರುವ ಪ್ರೀತಿ-ಮಮತೆಯನರಿತು
ಅಕ್ಕರೆಯಲೆನ್ನೊಡನೆ  ಸ್ನೇಹ ಬೆಸೆದಿಹುದೂ.......!!

 ಎನ್ನ ಹೃದಯದ ಒಳಗೆ ಮುಚ್ಚಿಟ್ಟ ಭಾವಗಳು
 ನಿನ್ನ ನೋಡಲು ಹೊರಗೆ ಹೊಮ್ಮುತಿಹುದು..........!.
ಯಾರಿಗೂ ಅರಿಯದಿಹ ಮೌನ ಭಾಷೆಯೇ ನಮದು
 ಎಲ್ಲ ನೋವನು ಮರೆಸೊ ಶಕ್ತಿ ಇದಕಿಹುದೂ............!!

ಎನ್ನ ಹೃದಯದಒಳಗೆ ಹೆಪ್ಪುಗಟ್ಟಿದ ನೋವು 
ಎಲ್ಲ ಮರೆಯುತ ನಾನು ನಿನ್ನಬೆಳೆಸಿದೆನು............!
ಕಕ್ಕುಲತೆಯಲೊಂದೊಂದು ಹನಿ ನೀರು ಗೊಬ್ಬರವುಣಿಸಿ 
ಬೆಳೆಯುತಿಹ  ಹೂ ಗಿಡವ ಮಮತೆಯಲೆ ಮೈದಡವಿ
ಯಾರ ವಕ್ರದ ದೃಷ್ಟಿ ತಾಕದಿರಲೆಂದು ಜತನದಲೇ ಕಾಪಾಡಿ ಪೋಷಿಸಿಹೆನೂ ...….....!!

 ನೀ ನಕ್ಕು ಅರಳಿದರು ಪರಿಮಳವ ಹರಡಿದರು 
ಅಹಮಿಕೆಯ ಬೆಳೆಸದಿರು ಓ ಎನ್ನ ಸುಮವೇ.......! 
ಬಿಸಿಲ ಬೇಗೆಗೆ ಬೆಂದು ಒಳಗೊಳಗೇ ನೊಂದರೂ 
ತಂಪಿಡಲು ಮಳೆ ಹನಿಯು ಬರಬಹುದು ಸುಮವೇ...!!
        

Thursday, April 8, 2010

ಕಂದಾ...



ನಗುತಲಿರು ಕಂದಾ...
ಹೀಗೆಯೇ ಎಂದೆಂದೂ....,
ಹೆತ್ತವರ ಒಡಲನು ತಂಪಾಗಿಸು ಎಂದೂ....;
ಜಲಧಿಯಂತೇ ಶುದ್ಧ ಪರಿಶುದ್ಧ ಎಳೆ ಮನಸು,
ನನಸಾಗಲಿ ನಿನ್ನ ಒಡಲಾಳದ ಕನಸು!
ಮುಗ್ಧ ನಗು ಮುಗ್ಧ ಮಗು,
ನೀ ಸಾಧನೆಯ ಹಾದಿಯಲಿ,
ಸಫಲತೆಯ ಪಡೆಯುತಲಿ;
ಬೆಳೆದು ಉಜ್ವಲಿಸುತಲಿ ಮುಂದೆ ಸಾಗೂ...!






























































































































































































































































































































































































































































Tuesday, March 9, 2010

ಹೊಸ ಬಾಳಿನ ಹಾಡು

ಸವಿಗನಸಿನ ಹೊಂಬಯಕೆಯ ನವರಸವನು ಬೀರೀ...,
ಹೊಸಬಾಳಿನ ತಂಗಾಳಿಗೆ ಸಂಪ್ರೀತಿಯ ತೋರೀ...;
ಮಿಂಚುತಲಿದೆ ಸೌಂದರ್ಯದ ನಗೆಕಣ್ಣಿನ ಕಾಂತೀ...,
ಚಿಮ್ಮುತಲಿದೆ ನವಜೀವನದುಸಿರಿನ ಸುಖ ಶಾಂತೀ...;
ಹೊಸ ಹಗಲಿನ ತೇರೆಳೆಯುತ ಉಲ್ಲಾಸದ ನಗುವೂ..,
ಹೂವಾಗೀ ಅರಳುತಲಿದೆ ಮುಗ್ಧ ಮೊಗದ ಚೆಲುವೂ...;
ತಿರುತಿರುಗುತ ಅರಸುತಲಿದೆ ಆಂತರ್ಯದ ಒಲವೂ...,
ಕೆಂದಾವರೆ ಮನವರಳಿದೆ ಮುನ್ನಡೆಯುವ ಛಲವೂ...;
ಉಕ್ಕೇರಲಿ ಜೀವನದಲಿ ಅನುರಾಗದ ಸುಧೆಯೂ...,
ಇಂಪಾಗಿಹ ಹಾಡಾಗಲಿ ಮನದ ಸ್ಪೂರ್ತಿ ಸೆಲೆಯೂ...!

Saturday, February 13, 2010

ಹೊಸ ವರುಷ








ಕಷ್ಟಗಳ ಸಹಿಸಿ ಬೆಳಕು ಹೊತ್ತು ತಿರುಗಿ,
ಕತ್ತಲೆಯ ಬವಣೆಗಳ ಒಳಗೊಳಗೇ ನುಂಗಿ;
ಸುಟ್ಟು ಮುಕ್ತಿ ಪಡೆಯುವತ್ತ ಸಾಗಿತು....,
ಉರಿದುರಿದು ಆರುತಲಿ ತಣ್ಣಗಾಯಿತು......;
ಹಳತು ಮಾಸಿ ಹೊಸ ವರುಷ ಬಂದಿತು,
ಹರುಷದಲಿ ಹೊಸ ಹುಟ್ಟು ಪಡೆದು ನಿಂದಿತು;
ಬಾವನೆಗಳ ಚೇತರಿಕೆಗಾಗಿ...........,
ಹೊಸ ಚಿಗುರುಗಳ ಅರುಣೋದಯಕ್ಕಾಗಿ...!
ಹಳೆಯ ಕಹಿ ಮರೆಯುತ್ತ ಹೊಸತನವ ರೂಪಿಸುತ,
ಬೆಳೆವ ಗಿಡ ಮರಕೆಲ್ಲ ಜೀವ ಸೆಲೆ ತುಂಬುತ್ತ;
ಹೊಸ ಗಾಳಿ ಮಳೆ ಬೆಳಕು ಎಲ್ಲವನು ನೀಡುತಲಿ,
ಬಂದಿರುವ ಹೊಸ ವರುಷ ಹರುಷ ತರಲಿ.........!

Monday, November 30, 2009

ಮುಗಿಲ ಸೊಬಗು.

















ಆಹಾ... ಏನಿದೂ..ಸೊಬಗು ಮುಗಿಲಿನಾ ಬೆಳ್ಗೊಡೆ,
ಬನ ಬನಗಳಲೂ ತಳಿರುಡುಗೆ ಹನಿಯಾಗಿ ಸುರಿದೊಡೆ;
ಸುಳಿಗುರುಳು ನಗೆಗನ್ನು ಅರಳಿಸುತ ನಕ್ಕು ಬಿಡೆ,
ವಸುಧೆಯಾ ಹೂಬನಕೆ ತನಿರಸವ ಕುಡಿಸಿಬಿಡೆ;
ಹಸಿರ ಬಿಸಿಯುಸಿರ ಹಿತವಾದ ಕಂಪನಕೆ,
ಕರಗಿ ಧರೆಗಿಳಿದು ಬಿಡು ಕುಸುಮಗಳ ವಿಕಸನಕೆ;
ಹಗಲಿರುಳು ಹಂಬಲಿಸಿ ಹಸಿದು ಕಾದಿಹ ವನಕೆ,
ಬೆಳ್ನೊರೆಯ ಹಾಲಿನಲಿ ಸ್ನೇಹ ತೋರುವ ಬಯಕೆ;
.....ಮುಗಿಲೆ ನಿನ್ನೊಲವೆ ಭುವಿಗೆ ನಲಿವೂ...,
ಬೆಳೆಯ ಉಸಿರಿಗೆ ನೀನೆಂದೂ ಜೀವ ಜಲವೂ...;
ನೀ ಒಲಿದರೇ..... ವಸುಮತಿಗೆ ವೈಭವವೂ,
ನೀ ಮುನಿದರೆ ಬಾಡಿ ಹೋಗುವುದೀ ಚೇತನವು!

.




Saturday, November 21, 2009

ನೇಸರ



ಜಗವನ್ನೇ ಬೆಳಗಿಸುವ ರವಿ ನಿನಗೆ ದಣಿವೇ,
ಶರಧಿಯಲಿ ಮಿಂದೆದ್ದು ನೀ ಮೇಲೆ ಬರುವೇ;

ಥಳ್ಪು ಬೆಳ್ಪುಗಳನ್ನು ಭುವಿಗೆ ನೀ ಕೊಡುವೆ,
ತನ್ನನ್ನೇ ಸುಡುತಲಿ ಜಗದ ಕಣ್ಣಾಗುವೆ;

ನೇಸರನೆ ನಿನ್ನಿಂದ ನಾ ಪಾಠ ಕಲಿವೆ,
ಮುಳುಗಿದರು ಮೇಲೆದ್ದು ಬರುವ ಕಲೆ ಕಲಿವೆ...!

ಧ್ರುವತಾರೆ

ಸಪ್ತ ಸ್ವರವೂ ಸೇರಿ ಹೊಮ್ಮಿತು ಸಂಗೀತ ನಿನಾದ,
ನಾದದಲೇ ಮೈ ಮರೆತು ನುಡಿಸುವ ಪ್ರತಿಭೆ ಅಗಾದ;
ಏರು ಎತ್ತರಕೇರು ಕನಸ ನನಸಾಗಿಸುತ ಬೆಳೆದು,
ಬೀರು ಪ್ರಜ್ವಲತೆಯನು ಹೆತ್ತವರ ನೆನೆ ನೆನೆದು;
ಹುಣ್ಣಿಮೆಯ ಶಶಾಂಕನ ಕಾಂತಿಯಂತೆ ಬೆಳಗು,
ಸಫಲತೆಯ ಸಾಧಿಸುತ ಧ್ರುವತಾರೆಯಂತೆ ಮಿನುಗು!