ಕಂದಾ...

ನಗುತಲಿರು ಕಂದಾ...
ಹೀಗೆಯೇ ಎಂದೆಂದೂ....,
ಹೆತ್ತವರ ಒಡಲನು ತಂಪಾಗಿಸು ಎಂದೂ....;
ಜಲಧಿಯಂತೇ ಶುದ್ಧ ಪರಿಶುದ್ಧ ಎಳೆ ಮನಸು,
ನನಸಾಗಲಿ ನಿನ್ನ ಒಡಲಾಳದ ಕನಸು!
ಮುಗ್ಧ ನಗು ಮುಗ್ಧ ಮಗು,
ನೀ ಸಾಧನೆಯ ಹಾದಿಯಲಿ,
ಸಫಲತೆಯ ಪಡೆಯುತಲಿ;
ಬೆಳೆದು ಉಜ್ವಲಿಸುತಲಿ ಮುಂದೆ ಸಾಗೂ...!

ಹೊಸ ಬಾಳಿನ ಹಾಡು

ಸವಿಗನಸಿನ ಹೊಂಬಯಕೆಯ ನವರಸವನು ಬೀರೀ...,

ಹೊಸಬಾಳಿನ ತಂಗಾಳಿಗೆ ಸಂಪ್ರೀತಿಯ ತೋರೀ...;

ಮಿಂಚುತಲಿದೆ ಸೌಂದರ್ಯದ ನಗೆಕಣ್ಣಿನ ಕಾಂತೀ...,

ಚಿಮ್ಮುತಲಿದೆ ನವಜೀವನದುಸಿರಿನ ಸುಖ ಶಾಂತೀ...;

ಹೊಸ ಹಗಲಿನ ತೇರೆಳೆಯುತ ಉಲ್ಲಾಸದ ನಗುವೂ..,

ಹೂವಾಗೀ ಅರಳುತಲಿದೆ ಮುಗ್ಧ ಮೊಗದ ಚೆಲುವೂ...;

ತಿರುತಿರುಗುತ ಅರಸುತಲಿದೆ ಆಂತರ್ಯದ ಒಲವೂ...,

ಕೆಂದಾವರೆ ಮನವರಳಿದೆ ಮುನ್ನಡೆಯುವ ಛಲವೂ...;

ಉಕ್ಕೇರಲಿ ಜೀವನದಲಿ ಅನುರಾಗದ ಸುಧೆಯೂ...,

ಇಂಪಾಗಿಹ ಹಾಡಾಗಲಿ ಮನದ ಸ್ಪೂರ್ತಿ ಸೆಲೆಯೂ...!

ಹೊಸ ವರುಷ

ಕಷ್ಟಗಳ ಸಹಿಸಿ ಬೆಳಕು ಹೊತ್ತು ತಿರುಗಿ,
ಕತ್ತಲೆಯ ಬವಣೆಗಳ ಒಳಗೊಳಗೇ ನುಂಗಿ;
ಸುಟ್ಟು ಮುಕ್ತಿ ಪಡೆಯುವತ್ತ ಸಾಗಿತು....,
ಉರಿದುರಿದು ಆರುತಲಿ ತಣ್ಣಗಾಯಿತು......;
ಹಳತು ಮಾಸಿ ಹೊಸ ವರುಷ ಬಂದಿತು,
ಹರುಷದಲಿ ಹೊಸ ಹುಟ್ಟು ಪಡೆದು ನಿಂದಿತು;
ಬಾವನೆಗಳ ಚೇತರಿಕೆಗಾಗಿ...........,
ಹೊಸ ಚಿಗುರುಗಳ ಅರುಣೋದಯಕ್ಕಾಗಿ...!
ಹಳೆಯ ಕಹಿ ಮರೆಯುತ್ತ ಹೊಸತನವ ರೂಪಿಸುತ,
ಬೆಳೆವ ಗಿಡ ಮರಕೆಲ್ಲ ಜೀವ ಸೆಲೆ ತುಂಬುತ್ತ;
ಹೊಸ ಗಾಳಿ ಮಳೆ ಬೆಳಕು ಎಲ್ಲವನು ನೀಡುತಲಿ,
ಬಂದಿರುವ ಹೊಸ ವರುಷ ಹರುಷ ತರಲಿ.........!